Skip to content

Pandidion

Aha do lapatan ni Pandidion i?

Ia Pandidion i ndada holan aek sambing, aek na marsaor Hata ni Debata do aek i; ai tona ni Debata do umbahen na binuat aek i.

Beha do pandok ni Debata?

Didok Tuhanta Jesus Kristus di ujung ni surat na sinurathon ni si Mateus: “Laho ma hamu, podai hamu ma saluhut bangso, didi hamu ma nasida tu bagasan goar ni Ama, Anak dohot Tondi Parbadia”.

Aha do uli sian Pandidion i?

On do: Saluhut halak na porsea di Hata ni Debata dohot dibagasan bagabagaNa, dapotan hasesaan ni dosa, dapotan dohot haluaon sian hamatean dohot sian sibolis jala dapotan hasonangan salelenglelengna.

Dia do didok Debata bagabagaNa?

Didok Tuhanta Jesus Kristus do di ujung ni surat na sinurathon ni si Markus: “Na porsea jala tardidi dapotan haluaon; alai na so porsea i, hona uhum do.

Beha do pangalaho ni aek i umbahen tung dihorhon i ulaon na sai godang?

Apala hinorhon ni aek i, na hinorhon ni Hata ni Debata do i, mandongani aek i dohot haporseaonniba na marhatutuhon mardongan Hata ni Debata aek i, ai anggo so Hata ni Debata dongan ni aek i, aek sambing do i, ndang tardok Pandidion; alai ia Hata ni Debata dongan aek i tardok ma Pandidion aek i. Na suksuk do asiasi di aek hangoluan i; ai Pandidion paimbaruhon hatutubu do aek i honrhon ni Tondi Parbadia. Ai songon do didok si Paulus di suratna tu si Titus di bindu patoluhon: “Dipangolu Debata do hita marhitehite Pandidion paimbaruhon hatutubu binahen ni Tondi Parbadia na nilehonNa i, dihabuashon tu hita ala ni Jesus Kristus partuaanta i asa pintor hita ala ni asi ni rohaNa, jala asa di hita hangoluan na so ra suda songon na hinirim ni rohanta i”. I do na tutu situtu.

Dia do lapatan ni na tardidi?

On do: Siauponta do ganup ari hinorhon solsol ni roha dohot hinorhon ni paimbaruhon roha isara ni ompungta si Adam rap dohot dosanta ro di angka sangkap ni roha na jahat asa mate sudena jala mulak mangolu hita ganup ari gabe jolma na imbaru, na tigor jala na ias roha, na mangolu di jolo ni Debata salelenglelengna.

Di dia do tarsurat hata i?

Didok si Paulus do di suratna tu halak Rom i di bindu paonomhon: “Na tartanom do hita rap dohot Ibana marhitehite Pandidion i tu bagasan hamatean, asa marparange hita dibagasan ngolu na imbaru, songon Kristus naung hehe sian angka na mate hinorhon hasangaphon ni AmaNa”.